ප්‍රදේශ කිහිපයකින් වාර්තා වූ සිද්ධීන්වලදී කාන්තාවන්ට ලිංගික හිරිහැර කිරීමේ චෝදනා මත හමුදා නිලධාරීන් දෙදෙනකු ඇතුළු සැකකරුවන් 4 දෙනකු අත්අඩංගුවට ගෙන තිබේ.

මත්තේගොඩ ප්‍රදේශයේදී ජනමාධ්‍යවේදිනියකට ලිංගික අතවර කළ බව කියන 35 හැවිරිදි යුධ හමුදාවෙන් පළා ආ සෙබළකු අත්අඩංගුවට ගෙන තිබේ.

මත්තේගොඩ පොලිසිය පැවසුවේ, සැකකරු නවතා තිබූ ත්‍රිරෝද රථයක් තුළ සිට ඇති අතර, එම කාන්තාව වාහනය පසුකර යමින් සිටියදී අනිසි ලෙස ස්පර්ශ කර ඇති බවයි.

කෙසේවෙතත්, ප්‍රදේශයේ ජනතාවගේ අවධානයට ලක්වන ලෙස එම කාන්තාව කෑගැසීමෙන් පසු ඔහු ත්‍රිරෝද රථය අතහැර දමා සැඟවී සිටියද, ඔවුන් විසින් අල්ලාගෙන ඇත.

සැකකරුගෙන් ප්‍රශ්න කිරීමේදී ත්‍රිරෝද රියේ ඉන්ධන අවසන් වූ බව පවසා පළායෑමට උත්සාහ කළත් එය වළක්වා පොලිසියට භාර දී ඇත.

කිළිනොච්චිය යුද හමුදා කඳවුරේ මුලින් සේවයේ යෙදී සිට ඇති මෙම පුද්ගලයා, මාස තුනක නිවාඩුවක් සඳහා ඉල්ලුම් කිරීමෙන් පසු හමුදා සේවය අතහැර දමා කුලී රථ සමාගමක ත්‍රිරෝද රථ රියදුරෙකු ලෙස සේවය කර ඇති බව විමර්ශනවලදී අනාවරණය වී තිබේ.

සැකකරු කැස්බෑව මහේස්ත්‍රාත් අධිකරණයට ඉදිරිපත් කිරීමට නියමිතය.

මේ අතර පොල්ගහවෙල බලා ධාවනය වූ දුම්රියක දී විශ්වවිද්‍යාල සිසුවියකගේ දෙපා වීඩියෝගත කළ යුද හමුදා සැරයන්වරයකු අත්අඩංගුවට ගෙන තිබේ.

මීරිගම පොලිසිය පැවසුවේ, අදාළ කාන්තාව කොළඹ සිට පොල්ගහවෙල බලා ධාවනය වෙමින් තිබූ දුම්රියේ සිට ඇති අතර, සැකකරු මීරිගම දුම්රිය ස්ථානයේ නතර කර ප්‍රතිවිරුද්ධ දෙසින් ධාවනය වූ දුම්රියක පැමිණ ඇති බවය.

දුම්රියේ පා පුවරුවේ සිටි සැකකරු කාන්තාවගේ නිරුවත් පාද රහසිගතව වීඩියෝ කර ඇති අතර, එය දුටු සෙසු මගීන් විසින් ඒ බව අදාළ තැනැත්තියට දන්වා ඇත.

අනතුරුව මගීන් විසින් මෙම පුද්ගලයා අල්ලාගෙන මීරිගම දුම්රිය ස්ථානාධිපතිවරයාට භාරදී ඇති අතර, පසුව මීරිගම පොලිසියට දන්වා ඇත.

ඒ අතරතුර සැකකරු ජංගම දුරකථනය තබා පළාගොස් ඇත.

ජංගම දුරකථනය පරීක්‍ෂා කිරීමෙන් පසු පොලිසිය සැකකරුගේ නිවසට ගොස් ඇති අතර, එහිදී සැකකරු පැලවත්ත යුද හමුදා කඳවුරේ සේවයට වාර්තා කළ බව සැකකරුගේ බිරිඳ දන්වා ඇත.

කඳවුරට දැනුම්දීමෙන් අනතුරුව සැකකරු මීරිගම පොලිසියට ඉදිරිපත් කර ඇති අතර, එහිදී සැකකරු අත්අඩංගුවට ගෙන තිබේ.

සැකකරු අත්තනගල්ල මහේස්ත්‍රාත් අධිකරණයට හඳුනාගැනීමේ පෙරට්ටුවකට ඉදිරිපත් කිරීමට නියමිත අතර මීරිගම පොලිසිය පරීක්ෂණ පවත්වයි.

එමෙන්ම හලාවත පොලිස් ස්ථානයේ රාජකාරියේ යෙදී සිටියදී පොලිස් නිලධාරිනියකගේ පාද වීඩියෝ කර සමාජ මාධ්‍ය ඔස්සේ හුවමාරු කළ තරුණයන් දෙදෙනෙකුද අත්අඩංගුවට ගෙන තිබේ.

සිද්ධියක් නිරාකරණය කර ගැනීම සඳහා සැකකරුවන් සුළු වැරදි මර්දන අංශයට පැමිණ ඇති අතර, එම අවස්ථාවේදී ඔවුන් තම පැමිණිල්ල මෙහෙයවන පොලිස් නිලධාරිනියගේ පාද වීඩියෝ කර ඇති බව වාර්තා වේ.

සිද්ධිය සම්බන්ධයෙන් කාන්තා පොලිස් නිලධාරිනිය විසින් ඔවුන්ට එරෙහිව පැමිණිලි කිරීමෙන් පසු සැකකරුවන් අත්අඩංගුවට ගෙන ඇත.