මියන්මාරයේ පරිගණක අපරාධකරුවන්ගේ සයිබර් කඳවුරේ බලහත්කාරයෙන් රඳවා සිටින ශ්‍රී ලාංකික තරුණ තරුණියන් 49 දෙනා සහ රුසියානු-යුක්රේන යුද්ධයට සම්බන්ධ කරගෙන සිටින ශ්‍රී ලාංකික රණවිරුවන් බේරා ගැනීමේ රාජ්‍ය තාන්ත්‍රික මෙහෙයුමක් සඳහා විපක්ෂයේ මන්ත්‍රීවරු තිදෙනෙක් බණ්ඩාරනායක අන්තර්ජාතික ගුවන් තොටුපළෙන් තායිලන්තය බලා පිටත්ව ගොස් තිබේ.

මෙම විපක්ෂ මන්ත්‍රීවරුන් දින 10ක සංචාරයක් සඳහා අද පෙරවරුවේ මොවුන් පළමුව මියන්මාරයට ගියේ රාජ්‍ය තාන්ත්‍රික නිලධාරීන් සහ තුන්වැනි පාර්ශ්වයන් සමඟ සාකච්ඡා කිරීමට වැඩපිළිවෙළක් සකස් කිරීමටයි.

මෙම ත්‍රිපුද්ගල කණ්ඩායමට නීතිඥ වසන්ත යාපා බණ්ඩාර, ජේ.සී අලවතුවල සහ සුජිත් සංජය පෙරේරා යන විපක්ෂයේ මන්ත්‍රීවරුන් ඇතුළත් වේ.

දින පහක් ගත කිරීම සඳහා මියන්මාරය බලා පිටත්ව යන බවත් පසුව දෙවැනි ගලවා ගැනීමේ මෙහෙයුම දියත් කිරීම සඳහා රුසියාවට යන බවත් ඔවුන් ප්‍රකාශ කර ඇත.

ත්‍රෛනිකායික මහා නායක හිමිවරුන්ගේ සහ විපක්ෂ නායකගේ ඉල්ලීම් ඇතුළත් ලිපිද රැගෙන මියන්මාරය සහ රුසියාව බලා පිටත්ව ගිය මෙම සාමාජිකයන් තිදෙනා තායිලන්තයේ සහ මියන්මාරයේ සංඝ නායකයන් සහ රුසියාවේ රාජ්‍යතාන්ත්‍රික නිලධාරීන් හමුවී සාකච්ඡා කරනු ඇත.

මෙම පිරිස අද අලුයම 01.10ට තායිලන්තයේ බැංකොක් බලා ශ්‍රී ලංකන් ගුවන් සේවයට අයත් යූඑල්-402 දරණ ගුවන් යානයෙන් කටුනායක ගුවන් තොටුපළෙන් පිටත්ව ගොස් තිබේ.