ශ්‍රී ලංකා ගමනාගමන මණ්ඩලයේ නුවරඑළිය ඩිපෝවේ ආරක්ෂක නිලධාරියකු ඝාතනය කර රුපියල් ලක්ෂ 10කට අධික මුදලක් සොරකම් කිරීමේ සිද්ධිය සම්බන්ධයෙන් එම ඩිපෝවේ මුදල් අයකැමිවරයකු සහ රියදුරකු ඇතුළු සැකකරුවන් තිදෙනෙකු අත්අඩංගුවට ගෙන තිබේ.

85 හැවිරිදි ආරක්ෂක නිලධාරියා දෙසැම්බර් 6 වැනිදා කපා කොටා ඝාතනය කර රුපියල් 1,052,167ක් සොරකම් කිරීම සම්බන්ධයෙන් පොලිසිය විමර්ශනයක් ආරම්භ කර තිබිණි.

ඝාතනයට ලක්ව ඇත්තේ නුවරඑළිය ගල්පාය ප්‍රදේශයේ පදිංචි කේ.ලෝගේෂ්වරන් (85) නමැති අයෙකි.

ආරක්ෂක නිලධාරියා ඝාතනය කිරීමෙන් පසු ලංගම ඩිපෝවේ කැබිනට්ටුවකින් මුදල් සොරකම් කර ඇති බව පොලිස් පරීක්ෂණවලදී අනාවරණ විය.

අත්අඩංගුවට ගත් සැකකරුවන් අවුරුදු 34ත් 55ත් අතර වයස්වල පසුවන්නන් බව පොලිසිය පවසයි.

බදුල්ල සහ මහව ප්‍රදේශවල පදිංචිකරුවන් ඔවුන් නුවරඑළිය මහේස්ත්‍රාත් අධිකරණයට ඉදිරිපත් කිරීමෙන් අනතුරුව දෙසැම්බර් 19 වැනිදා දක්වා රක්ෂිත බන්ධනාගාර ගත කර තිබේ.