November 19, 2024
කෑගල්ල තෙලිඇල්ලේ දිය නෑමට ගිය 27 හැවිරිදි තරුණයකු දියේ ගිළී මියගොස් තිබේ.
ප්‍රදේශවාසීන් අතර ජනප්‍රිය ස්ථානයක් වන තෙලිඇල්ලට ගොස් මිතුරන් පිරිසක් සමඟ එක්ව සිය උපන්දිනය සමරමින් සිටියදී මෙම අනතුර සිදුව ඇතැයි වාර්තා වේ.
මෙලෙස මියගොස් ඇත්තේ කෑගල්ල ප්‍රදේශයේ පදිංචි අශාන් ප්‍රබෝධ නමැති තරුණයෙකි.
කෙසේවෙතත්, ප්‍රදේශවාසීන් පවසන්නේ මෙම පිරිස දිය නෑමට පෙර ඇල්ල අසල පැය කිහිපයක් මත්පැන් පානය කර ඇති බවයි.
පසුව එම පිරිස දිය ඇල්ලේ දිය නාමින් සිටියදී 27 හැවිරිදි තරුණයා දියේ ගිලී මියගොස් තිබේ.
අදාළ තරුණයාගේ සිරුර ඊයේ (18) පස්වරුවේ දිය ඇල්ලේ සිට කිලෝමීටරයක් පමණ දුරින් ජලයේ පාවෙමින් තිබියදී සොයා ගෙන ඇත.
සිද්ධියෙන් ඛේදජනක ලෙස ජීවිතය අහිමි වූ මෙම තරුණයා ලබන සතියේ විදේශගත වීමට සූදානමින් සිටි බව ද වාර්තා වේ.
