ආරුගම් බොක්ක ප්‍රදේශයට එල්ල විය හැකි ත්‍රස්තවාදී තර්ජන සම්බන්ධයෙන් ආරක්ෂක අනතුරු ඇඟවීම් නිකුත් කිරීමෙන් පසු ඊශ්‍රායල ජාතිකයෝ 22 දෙනෙක්ගෙන් යුත් කණ්ඩායමක් කටුනායක බණ්ඩාරනායක අන්තර්ජාතික ගුවන් තොටුපොළින් ඊයේ පිටත්ව ගියහ.

මෙම සිදුවීම පිළිබඳ පළමු අනතුරු ඇඟවීම කොළඹ එක්සත් ජනපද තානාපති කාර්යාලය විසින් නිකුත් කරන ලද අතර, පසුව ඊශ්‍රායල ජාතික ආරක්ෂක කවුන්සිලය විසින් සංචාරකයන් ඉලක්ක කර ගත හැකි ප්‍රහාරයක් පිළිබඳ විශ්වාසදායක බුද්ධි තොරතුරු හේතුවෙන් ඔවුන්ගේ පුරවැසියන්ට ආරුගම් බොක්ක වෙතින් හෝ ශ්‍රී ලංකාවෙන් පිටව යෑමට උපදෙස් දෙන ලදී.

ඊශ්‍රායල ජාතිකයන් ගුවන් තොටුපොළ වෙත ගොස් අලුයම 3:03 ට ඩුබායි බලා පිටත් වූ ෆ්ලයි ඩුබායි FZ 570 ගුවන් යානයෙන් මෙරටින් පිටත්ව ගිය බව වාර්තා වේ.

කොළඹ සිට ඊශ්‍රායලයට සෘජු ගුවන් ගමන් නොමැති බැවින් කණ්ඩායම ඩුබායි සිට ටෙල් අවිව් හෝ ජෙරුසලම වෙත ගමන් කරනු ඇත.

එක්සත් ජනපදය, එක්සත් රාජධානිය, ඕස්ට්‍රේලියාව, කැනඩාව, නවසීලන්තය සහ ඊශ්‍රායලය ඇතුළු තානාපති හා මහකොමසාරිස් කාර්යාල කිහිපයක් ආරුගම් බොක්ක වැනි ප්‍රදේශවලදී ප්‍රවේශම් වන්නැයි උපදෙස් දෙමින්
සංචාරක අනතුරු ඇඟවීම් නිකුත් කිරීමෙන් පසුව, රට පුරා ඉහළ ආරක්ෂක පියවර මාලාවක් අනුගමනය කෙරෙමින් පවතී.

ඊශ්‍රායල ජාතිකයින්ට එල්ල වූ ආරක්ෂක තර්ජන සම්බන්ධයෙන් සැකකරුවන් තිදෙනකු අත්අඩංගුවට ගෙන ඇති බව බලධාරීහු ඊයේ අනාවරණ කළහ.