නේපාලයේ කත්මන්ඩු අගනුවර සිට ගුවන්ගත වෙමින් තිබියදී ගුවන් යානයක් කඩා වැටී ගිනි ගැනීමෙන් පුද්ගලයන් 18 දෙනෙකු මියගොස් තිබේ.

මේ වන විට රෝහල්ගතව ප්‍රතිකාර ලබන ගුවන් නියමුවා මෙම මාරක අනතුරින් දිවි ගලවා ගත් එකම පුද්ගලයා වේ.

සෞර්‍යා ගුවන් සේවයේ තාක්ෂණික කාර්ය මණ්ඩල සාමාජිකයන් සහ කාර්ය මණ්ඩල සාමාජිකයන් දෙදෙනෙකු ඇතුළුව පුද්ගලයන් 19 දෙනෙකු මෙමෙ පරීක්ෂණ ගුවන් ගමනේ සිට ඇති බව විදෙස් මාධ්‍ය වාර්තා කරයි.

නේපාල සිවිල් ගුවන් සේවා අධිකාරියේ සෙවීම් සහ ගලවා ගැනීමේ සම්බන්ධීකරණ මධ්‍යස්ථානයේ ප්‍රකාශයකට අනුව, යානය ත්‍රිභුවන් අන්තර්ජාතික ගුවන් තොටුපළෙන් ගුවන්ගත වී මිනිත්තු කිහිපයකට පසු මෙම අනතුර සිදුව තිබේ.

සෞර්‍යා ගුවන් සේවයේ මෙම පරීක්ෂණ ගුවන් ගමන ජනප්‍රිය සංචාරක ගමනාන්තයක් වන පොක්හාරා වෙත ගමන් කිරීමට නියමිතව තිබිණි.

ගුවන් තොටුපළ ප්‍රධානී ජගන්නාත් නිරවුලා ප්‍රකාශ කර ඇත්තේ අනතුරට හේතුව තහවුරු කිරීමට ගුවන් තොටුපළ බලධාරීන්ට නොහැකි වුවද, එය පොළවෙන් ඉවත් වූ විගසම, විනාඩියකටත් වඩා අඩු කාලයකදී අනතුර සිදු වූ බවයි.

යානය වැරදි දිශාවකට පියාසර කර ඇති බවට මූලික තක්සේරුවකින් පෙනී ගිය බව ද ඔහු ප්‍රකාශ කර ඇත.

අනතුරත් සමග යානය ගින්නෙන් සහ දුමෙන් වැසී ගොස් තිබිණි.

සිද්ධියෙන් පසු ගිනි නිවන රථ සහ ගිලන්රථ එම ස්ථානයට ගොස් තිබිණි.

මියගිය අයගෙන් 17 දෙනෙකු නේපාල ජාතිකයන් වන අතර එක් අයකු ඉංජිනේරුවෙකු ලෙස සේවය කළ යේමන ජාතිකයෙකි.