මත්ද්‍රව්‍ය ජාවාරම් ඇතුළු විවිධ අපරාධ ක්‍රියාවලට සම්බන්ධ තොරතුරු තාවකාලික වාසස්ථාන ආශ්‍රිතව වාර්තා වීමත් සමග දෙදින ජාතික මෙහෙයුමක් මගින් තාවකාලික පදිංචිකරුවන් 178,600කට අධික පිරිසකගේ තොරතුරු පොලිසිය විසින් රැස්කරගෙන තිබේ.

මත්ද්‍රව්‍ය ජාවාරම් ඇතුළු විවිධ සාපරාධී ක්‍රියාවල යෙදී සිටින පුද්ගලයන් ඔවුන් පදිංචි ස්ථිර පොලිස් බල ප්‍රදේශයෙන් පිටත කුලී නවාතැන්වල පදිංචිව සිටින බවට වන නිරීක්‍ෂණයට ප්‍රතිචාර වශයෙන් මෙම වැඩසටහන ආරම්භ කර ඇත.

පොලිස් ආඥාපනත පනතේ 76 වැනි වගන්තිය ප්‍රකාරව සෑම ග්‍රාම නිලධාරී වසමකම තාවකාලික පදිංචිකරුවන්ගේ තොරතුරු එක්රැස් කර සත්‍යාපනය කිරීම සඳහා සති අන්තයේ (මැයි 11 සහ 12) මෙහෙයුමක් ක්‍රියාත්මක කරන ලෙස පොලිස්පති දේශබන්දු තෙන්නකෝන් පොලිසියට නියෝග කර තිබිණි.

මෙම මෙහෙයුමේදී රට පුරා කුලී නිවාසවල සහ බදු පදනම මත පදිංචිව සිටින පවුල් 37,183ක පුද්ගලයන් 112,963ක් පිළිබඳ තොරතුරු රැස්කර ගෙන ඇත.

ඊට අමතරව කුලියට ගත් කාමරවල පදිංචිව සිටින පවුල් 10,755ක පුද්ගලයන් 34,133කගේ දත්ත එක්රැස් කරගෙන තිබේ.

නිවාස මුරකරුවන්, ගෘහ සේවිකාවන් සහ භාරකරුවන් වැනි තාවකාලික පදිංචිකරුවන් 31,517ක් ඇතුළුව 178,600කට අධික පිරිසකගේ විස්තර මෙයට ඇතුළත් වේ.

එක් එක් පුද්ගලයා පිළිබඳ එක්රැස් කරන ලද තොරතුරු අත් අඩංගුවට ගන්නා පිරිසගේ අධීක්ෂණ තොරතුරු පද්ධතිය (AMIS), ස්වයංක්‍රීය ඇඟිලි සලකුණු හඳුනාගැනීමේ පද්ධතිය (AFIS) සහ පොලිස් මත්ද්‍රව්‍ය නාශක කාර්යාංශය වෙත පරීක්ෂාව සඳහා යොමු කරනු ලැබේ.