April 1, 2025
රෝමයේ තදාසන්න ප්‍රදේශයක මෝටර් රථ ප්‍රදර්ශනාගාරයක හටගත් ගින්නකින් ටෙස්ලා මෝටර් රථ 17ක් විනාශ වී ඇතැයි ඉතාලි ගිනිනිවන නිලධාරීන් පවසයි.
ගින්න හටගන්නා අවස්ථාවේ ප්‍රදර්ශනාගාරය තුළ කිසිවකු සිට නොමැති බැවින් කිසිවකුටත් ගානි සිදුව නොමැති බව වාර්තා වේ.
රෝමයේ ගිනිනිවන සේවය පැවසුවේ ගින්න ඇති වූ ආකාරය සොයා විමර්ශන ක්‍රියාත්මක බවයි.
ගින්නට හේතු සොයා විමර්ශනය කරන අතර එය ගිනිතැබීමක් දැයි යන්න බැහැර නොකළ බව විමර්ශන නිලධාරීහු පවසති.
රෝම ප්‍රාදේශීය පොලිසිය පවසන්නේ, විමර්ශන නිලධාරීන් සිද්ධිය සම්බන්ධයෙන් ප්‍රදර්ශනාගාරයේ අලෙවි නියෝජිතයන් සමඟ සාකච්ඡා කර සාක්ෂි මත පදනම්ව ඉදිරි කටයුතු මෙහෙයවන බවයි.
මෑත සතිවල ඉතාලිය පුරා ටෙස්ලා වාහන විනාශ කිරීම සහ හානිකිරීම පිළිබඳ වාර්තා පළවිය.
එමෙන්ම ඇතැම් ස්ථානවල එලොන් මස්ක් විරෝධී සහ ඩොනල්ඩ් ට්‍රම්ප් විරෝධී ප්‍රකාශ තීන්ත මගින් ලිවීමේ සිද්ධීන් ද වාර්තා විය.
එවන් පසුබිමක මෙම ගිනිගැනීමේ සිද්ධිය වාර්තා වූ අතර, මීට සතියකට පෙර උතුරු රෝමයේ තවත් මෝටර් රථ ප්‍රදර්ශනාගාරයක් ගිනිතැබීමේ සිදුවීමක් ද වාර්තා විය.
එමගින් භාවිත කළ ටෙස්ලා රථ ඇතුළු මෝටර් රථ 30 ක් විනාශ වී තිබිණි.
ගින්න විදුලි කාන්දුවක් නිසා ඇති වූ බව පැවසෙන නමුත් ඒ පිළිබඳව විමර්ශනයක් සිදුවෙමින් පවතී.
රෝමයේ මෙන්ම ඉතාලි අගමැති ජෝර්ජියා මෙලෝනි හැදී වැඩුණු ගාබටෙල්ලා ප්‍රදේශයේදී ද ටෙස්ලා මෝටර් රථ කිහිපයකට හානි සිදුකර තිබූ අතර, ඒවා සමාජ මාධ්‍ය ඔස්සේ පුළුල් ලෙස සංසරණය වී තිබේ.
