ශ්‍රී ලංකා රේගුවේ තැපැල් තක්සේරු අංශයේ නිලධාරීන් විසින් පසුගිය සති දෙක තුළ මධ්‍යම තැපැල් හුවමාරුවේ හිමිකම් නොකියූ රුපියල් මිලියන 17.8ක් වටිනා මත්ද්‍රව්‍ය අඩංගු පාර්සල් සොයාගෙන ඇත.

ප්‍රංශය, ඇමරිකා එක්සත් ජනපදය, කැනඩාව සහ නෙදර්ලන්තය යන රටවලින් මහනුවර, මීගමුව, ජා-ඇල, වැල්ලවත්ත, නුගේගොඩ, තංගල්ල, මහියංගනය සහ යාපනය යන ලිපිනයන්ට මෙම පාර්සල් මධ්‍යම තැපැල් හුවමාරුවට පැමිණ ඇති බව වාර්තා වේ.

පසුගිය සති දෙක තුළ එවැනි පාර්සල් 20 ක් පමණ පැමිණ ඇති අතර ඒවාට හිමිකම් නොකියා තිබූ බැවින්, පාර්සල් පරීක්ෂා කිරීම සඳහා මාර්තු 19 වැනි දින තැපැල්පතිවරයාගේ අවසරය ලැබී තිබේ.

පරීක්ෂාව අතරතුර, පාර්සල් 14 ක කුෂ් ගංජා ග්‍රෑම් 272 ක් සහ මෙතම්ෆෙටමින් පෙති 2,049 ක් නිලධාරීන් විසින් සොයාගෙන ඇත.

රේගු මත්ද්‍රව්‍ය පාලන අංශයේ නිලධාරීන් විසින් මෙම මත්ද්‍රව්‍ය හඳුනාගෙන සහතික කිරීමෙන් පසු පරීක්ෂණ සඳහා පොලිස් මත්ද්‍රව්‍ය කාර්යාංශයට මත්ද්‍රව්‍ය භාරදී තිබේ.