දකුණු ලෙබනනයේ නකෝරා හි පිහිටි එක්සත් ජාතීන්ගේ අන්තර්වාර බලකායේ අණදෙන මධ්‍යස්ථානයේ සිටින පිරිසට ඉන් ඉවත්වන ලෙස ඊශ්‍රායලය කළ දැනුම්දීමක් එම මධ්‍යස්ථානය විසින් ප්‍රතික්ෂේප කර තිබේ.

ඊශ්‍රායල ආරක්ෂක හමුදා විසින් සිකුරාදා දිනයේ ගුවනින් සහ ගොඩබිමෙන් ප්‍රහාර එල්ල කළ අතර එහිදී කඳවුරේ සේවය කරන ශ්‍රී ලාංකික සොල්දාදුවන් දෙදෙනෙකුට ද තුවාල සිදුව තිබිණි.

ඊශ්‍රායල ආරක්ෂක හමුදා එක්සත් ජාතීන්ගේ සාම සාධක භටයන්ට එම කඳවුරෙන් ඉවත් වන ලෙස ඉල්ලා ඇත්තේ හිස්බුල්ලා සටන්කාමීන් ඒ අවට සිට ගොඩබිම් හමුදාවන්ට වෙඩි තබන බව පවසමිනි.

එක්සත් ජාතීන්ගේ අන්තර්වාර බලකායේ අණදෙන මධ්‍යස්ථානය ඉවත් වීම ප්‍රතික්ෂේප කර තිබූ අතර පැය 48ක් තුළ එම කඳවුරට දෙවරක් ප්‍රහාර එල්ල වී තිබිණි.

එක්සත් ජාතීන්ගේ අන්තර්වාර බලකායේ අණදෙන මධ්‍යස්ථානයේ ප්‍රකාශක Andrea Tenenti පවසා ඇත්තේ ඊශ්‍රායලය සහ ලෙබනනය වෙන් කරන ‘නිල් රේඛාවේ’ සිට කිලෝමීටර් පහක දුරකින් පිහිටි ස්ථානවලින් ඉවත් වන ලෙස ඊශ්‍රායලය එක්සත් ජාතීන්ගේ අන්තර්වාර බලකායේ අණදෙන මධ්‍යස්ථානය වෙත ඉල්ලා ඇති නමුත් සාම සාධක භටයන් එය ප්‍රතික්ෂේප කර ඇති බවයි.

ශ්‍රී ලංකා සොල්දාදුවන් 125 දෙනෙක් එක්සත් ජාතීන්ගේ ධජය යටතේ එම අණදෙන මධ්‍යස්ථානයේ රැඳී සිටිති.

එක්සත් ජාතීන්ගේ අන්තර්වාර බලකායේ අණදෙන මධ්‍යස්ථානය සතුව විවිධ ජාතීන්ට අයත් භටයන් 9,500ක් පමණ සිටින අතර ඊශ්‍රායලය සහ හිස්බුල්ලා අතර 2006 වසරේ දින 33ක් පැවති යුද්ධයක් අවසන් කළ සටන් විරාමය නිරීක්ෂණය කිරීමේ වගකීම ඔවුන් වෙත පැවරී ඇත.

එක්සත් ජාතීන්ගේ සාම සාධක භටයන් 5 දෙනෙකු මේ වන විට තුවාල ලබා ඇති අතර තුවාල ලැබූ ශ්‍රී ලංකා සෙබළුන් දෙදෙනාගෙන් එක් අයෙකු ගෙල ප්‍රදේශයේ ශල්‍යකර්මයක් සඳහා යොමුකර සුවය ලබමින් සිටී.

කොළඹදී විදේශ අමාත්‍යාංශය එක්සත් ජාතීන්ගේ ධජය යටතේ සේවය කරන එහි නිර්භීත සොල්දාදුවන් අගය කළ අතර ප්‍රහාරය දැඩි ලෙස හෙළා දකින බවත් ශ්‍රී ලංකාව සෑම විටම එක්සත් ජාතීන්ගේ නිලධාරීන්ගේ ආරක්ෂාව සහ එක්සත් ජාතීන්ගේ පරිශ්‍රවල නොබිඳිය හැකි ආරකෂාව බව සහතික කිරීමට බැඳී සිටින බවත් පවසා තිබේ.

යුද හමුදා මාධ්‍ය ප්‍රකාශක මේජර් ජෙනරාල් රසික කුමාර පවසන්නේ තුවාල ලැබූ එක් ශ්‍රී ලංකා සාම සාධක භටයකු එක්සත් ජාතීන්ගේ මූලික රෝහලේම ප්‍රතිකාර ලබන අතර අනෙක් පුද්ගලයා සුළු ශල්‍යකර්මයක් සඳහා කඳවුරේ සිට කිලෝමීටර් 20ක් පමණ දුරින් පිහිටි ජබල් අමෙල් රෝහලට ඇතුළත් කර ඇති බවයි.

“ඉලක්කය එක්සත් ජාතීන්ගේ කඳවුර නොවේ. එය ගුවන් ප්‍රහාරයකින් පැමිණි කොටසක්. ගුවන් ප්‍රහාර, ගොඩබිම් ප්‍රහාර සහ කාලතුවක්කු ප්‍රහාර එකවර දියත් කළ නිසා ඔවුන්ට එය වෙන්කර හඳුනාගත නොහැකියි. එය නකෝරා ගම්මානයට එල්ල කළ ගුවන් ප්‍රහාරයක් බවට ඔවුන් සැක කරනවා,” යැයි මේජර් ජෙනරාල් කුමාර පවසයි.

ශ්‍රී ලංකා තානාපති කාර්යාලය එක්සත් ජාතීන්ගේ අන්තර්වාර බලකායේ අණදෙන මධ්‍යස්ථානය සමඟ සමීප සම්බන්ධතා පවත්වන අතර තත්ත්වය නිරීක්ෂණය කරයි.