August 15, 2024
මේ වසරේ මේ දක්වා ජලභීතිකා රෝගය හේතුවෙන් මෙරට මරණ එකොළහක් (11) වාර්තා වී ඇති බව සෞඛ්‍ය අමාත්‍යාංශයේ වසංගත රෝග විද්‍යා අංශය පවසයි.
වසංගත රෝග විද්‍යා අංශයේ ජ්‍යෙෂ්ඨ රෙජිස්ට්‍රාර් වෛද්‍ය අතුල ලියනපතිරණ පවසන්නේ ආසාදිත සතෙකුගේ සපාකෑම් සහ සීරීම් මගින් පැතිර යා හැකි වෛරස් රෝගයක් වන ජලභීතිකාව පිළිබඳ මහජනතාවගේ අඩු අවබෝධය හේතුවෙන් බොහෝ මරණ සිදුවී ඇති බවයි.
කෙසේවෙතත් පසුගිය වසරට සාපේක්ෂව ජලභීතිකා රෝගයෙන් මිය ගිය සංඛ්‍යාව අඩකින් අඩු කිරීමට බලධාරීන් සමත් වී ඇති බව වෛද්‍ය අතුල ලියනපතිරණ පවසයි.
අවශ්‍ය වෛද්‍ය ප්‍රතිකාර නිසිලෙස අනුගමනය නොකිරීම නිසා මේ වසරේ මේ දක්වා මරණ 11ක් වාර්තා වී තිබෙන බවත් රාජ්‍ය රෝහල් 300ක ජලභීතිකා එන්නත් තිබෙන බවත් ඔහු පෙන්වා දෙයි.
වඩාත් දරුණු සපා කෑමකදී ලබා දෙන එන්නත ද රෝහල් 100ක පමණ ඇති බව ඔහු සඳහන් කරයි.
මෙම එන්නත් නොමිලේ ලබාදෙන බව සඳහන් කළ වෛද්‍ය අතුල ලියනපතිරණ, ජලභීතිකා රෝගය වැළඳුණු සතකු සපා කෑවහොත් වහාම වෛද්‍ය ප්‍රතිකාර ලබා ගන්නා ලෙස ජනතාවට උපදෙස් දෙයි.
ජලභීතිකා රෝගය සාමාන්‍යයෙන් සම්ප්‍රේෂණය වන්නේ ජලභීතිකා රෝගය වැළඳුණු සතකු සපා කෑමෙන් හෝ ජලභීතිකා රෝගය වැළඳුණු සතකු දැනට පවතින තුවාලයක් ලෙවකෑමෙනි.
තුවාලයකින් තොරව ඇස්, නාසය, මුඛය සහ ලිංගික අවයව අවට ඇති ශ්ලේෂ්මල පටල හරහා ද සම්ප්‍රේෂණය විය හැකි බව වෛද්‍ය අතුල ලියනපතිරණ පවසයි.
ජලභීතිකා රෝග ලක්‍ෂණ සති තුනත් මාස තුනත් අතර කාලය තුළ දිස්වන බවත් රෝග ලක්‍ෂණ ඇති වූ කාලසීමාව කුමක් වුවත් රෝහල්වලින් ආසාදිත පුද්ගලයන්ට එන්නත් ලබාදීම සිදු කරන බවත් වෛද්‍ය අතුල ලියනපතිරණ පෙන්වාදෙයි.
