ඉදිරි පාර්ලිමේන්තු මැතිවරණයට අදාළව මේ වන විට පැමිණිලි 340ක් ලැබී ඇති බව පොලිසිය පවසයි.

ඊයේ (08) පැවති ජනමාධ්‍ය හමුවකදී පොලිස් මාධ්‍ය ප්‍රකාශක නියෝජ්‍ය පොලිස්පති නිහාල් තල්දූව කියා සිටියේ මැතිවරණ නීති කඩකිරීම් සම්බන්ධයෙන් අපේක්ෂකයන් 11 දෙනෙකු සහ ආධාරකරුවන් 356 දෙනෙකු ඇතුළු පුද්ගලයන් 364 දෙනෙකු අත්අඩංගුවට ගෙන ඇති බවයි.

ලැබී ඇති පැමිණිලිවලින් 54ක් අපරාධ ස්වභාවයක් ඇති ඒවා වන අතර 286ක් මැතිවරණ නීති උල්ලංඝණය කිරීම් සම්බන්ධයෙන් බව පොලිස් වාර්තා පෙන්වා දෙයි.

පැමිණිලි සම්බන්ධයෙන් වාහන 94ක් ද පොලිස් භාරයට ගෙන ඇත.

මීට අමතරව, පොලීසිය විසින් පෝස්ටර් මිලියන 1.07කට අධික ප්‍රමාණයක් ඉවත්කර ඇති අතර නීති විරෝධී ලෙස ප්‍රවාහනය කරන ලද අතිරේක පෝස්ටර් ලක්ෂ 5ක් පමණ අත්අඩංගුවට ගෙන තිබේ.

බැනර් 855ක් ඉවත් කිරීමටත් බැනර් 458ක් රාජසන්තක කිරීමටත් කටයුතු කර ඇත.

කටවුට් 1,010ක් ද ඉවත් කර ඇති අතර අතිරේක කටවුට් 1,322ක් අත්අඩංගුවට ගෙන ඇත.

අත් පත්‍රිකා 5,045ක් ඉවත් කර ඇති බවත්, පත්‍රිකා 64,000කට අධික ප්‍රමාණයක් පොලිස් භාරයට ගෙන ඇති බවත් පොලිස් මාධ්‍ය ප්‍රකාශකවරයා පැවසීය.

මේ අතර, මැතිවරණයට අදාළ පැමිණිලිවල වැඩිවීමක් මැතිවරණ කොමිෂන් සභාව වාර්තා කළ අතර, පෙරේදා (07) වන විට ඔවුන්ට පැමිණිලි 150ක් ලැබී තිබේ.

ඉන් 149ක් මැතිවරණ නීති උල්ලංඝණය කිරීම් සම්බන්ධයෙන් වන අතර එක් පැමිණිල්ලක් ප්‍රචණ්ඩ ක්‍රියාවක් සම්බන්ධයෙනි.

සැප්තැම්බර් 26 වැනිදා සිට මැතිවරණ කොමිෂන් සභාවට මැතිවරණ නීති උල්ලංඝණය කිරීම් සම්බන්ධයෙන් පැමිණිලි 2,023ක් සහ ප්‍රචණ්ඩ ක්‍රියා 20ක් සමඟ මුළු පැමිණිලි 2,088ක් ලැබී ඇත.