නඩු පැවරීමේ කටයුතු ශක්තිමත් කිරීම සඳහා ජාතික ළමා ආරක්ෂක අධිකාරියට නව නිලධාරීන් 100 කට අධික පිරිසක් බඳවාගැනීමට රජය තීරණය කර ඇතැයි කාන්තා හා ළමා කටයුතු අමාත්‍යාංශය පවසයි.

කාන්තා හා ළමා කටයුතු නියෝජ්‍ය අමාත්‍ය නාමල් සුදර්ශන The Daily Morning වෙත අදහස් දක්වමින් පවසා ඇත්තේ, වත්මන් පරිපාලනය බලයට පත්වන විට ජාතික ළමා ආරක්ෂක අධිකාරිය අවශ්‍ය ප්‍රමාණයට වඩා 50%කට ආසන්න අඩු කාර්ය මණ්ඩලයකින් ක්‍රියාත්මක වූ බවයි.

විශේෂයෙන්ම නීති දෙපාර්තුමේන්තුවේ පවතින මෙම දැඩි හිඟය ළමා ආරක්‍ෂාව සම්බන්ධ නඩු විභාග කිරීමේදී සැළකිව යුතු ප්‍රමාදයක් ඇති කිරීමට හේතු වූ බවද ඔහු පැවසීය.

“අපට මූලස්ථානයේ සහ දිස්ත්‍රික් මට්ටමින් විශාල නිලධාරීන්ගේ හිඟයක් තිබුණා. සමහර අවස්ථාවල එක් නිලධාරියෙක් දිස්ත්‍රික්ක දෙකකට වගකිව යුතුයි. ඊට විසඳුමක් ලෙස ජාතික ළමා ආරක්ෂක අධිකාරියට නිලධාරීන් 100කට වැඩි පිරිසක් බඳවාගැනීමට තීරණය කර තිබෙනවා. විවිධ ආයතනවල පුරප්පාඩු අධීක්ෂණය කරන අග්‍රාමාත්‍ය කාර්යාලය යටතේ ඇති කමිටුවක් හරහා අදාළ අනුමැතිය ලබා දී තිබෙනවා” ඔහු පැහැදිලි කළේය.

එමෙන්ම නියෝජ්‍ය අමාත්‍ය නාමල් සුදර්ශන පැවසුවේ, ඉදිරි පළාත් පාලන මැතිවරණය හේතුවෙන් බඳවාගැනීම් මේ මොහොතේ සිදුකළ නොහැකි වුවද මැතිවරණය අවසන් වූ වහාම එම බඳවා ගැනීම් සිදුකරන බවයි.

මෙම බඳවාගැනීම් සමඟ, ජාතික ළමා ආරක්ෂක අධිකාරිය සිය විශාල නඩු ප්‍රමාණය විභාගයට සහ රට පුරා ළමා ආරක්ෂණ වැඩසටහන් ශක්තිමත් කිරීමට වඩා හොඳින් සන්නද්ධ වනු ඇති බව ද ඔහු පෙන්වාදුන්නේය.

1998 අංක 50 දරන ජාතික ළමා ආරක්ෂක අධිකාරි පනත යටතේ පාර්ලිමේන්තුව විසින් එම අධිකාරිය පිහිටුවන ලද්දේ ළමා අපයෝජන වැළැක්වීම, වින්දිතයින් ආරක්ෂා කිරීම සහ සහාය දීම සහ සියලු ආකාරයේ ළමා අපචාරවලට එරෙහිව ක්‍රියාමාර්ග සම්බන්ධීකරණය සහ අධීක්ෂණය කිරීම සම්බන්ධ ප්‍රතිපත්ති සහ නීති පිළිබඳව රජයට උපදෙස් දීම සඳහා ය.